Hegoafrikako cape town eta irlandako dublin hiriekin lehiatzen ari da. Aintzatespen honen arabera, hiria berpizteko ekimenak antzematen dira eta bertan bizi diren hiritarren bizi-kalitatea aitortzen da diseinua modu erabilgarrian aplikatu izanagatik.

Bilbo modernotasunaren sinonimo da. Eraldaketa asko izan ditu hiriak azken hamarkadetan eta horiek hiritarren bizi-kalitatea hobetzeko asmoarekin burutu dira. Estetikaz ­eta ekonomiaz landa, aurrerapen ugari eduki ditu Bilbok. Adibi­dez, hiritarren mugikortasunaren mesedetan hainbat igogailu ezarri dira, Uribarri edo Maza­rredokoak kasu.

Bestetik, aldapak eta eskailerak saihesteko ne­urri modernoak erabili izan dira eta horiek egitura eta teknologia modernoen lagun­tzaz burutu dira. Hiriak aire freskoz garbitu du aurpegia.

Azpiegitura, egitura eta eko-teknologiak; artea, diseinua, museoak eta kultur guneak edo ongizate turismoaren sustapena. Hamaika pausu eman ditu Bil­bok ahalik eta hiri moderno eta integratzaileena eratzeko. Hori dela-eta, orain, disei­nuaren nazioarteko hiriburu bi­hurtzeko ate aurrean aurkitzen da.

Ekimenak ekimen, ahaleginak ahalegin, Bizkaiko hiriburua hautatu dute 2014ko Diseinuaren Munduko Hiriburu (World De­sign Capital 2014) bihurtzeko finalista gisa. Orotara, 24 herrialdetako 56 hirik aurkeztu dute beraien hautagaitza, baina, azkenean, hiru finalista geratu dira: He­goafrikako Cape Town, Irlan­da­ko Dublin eta Bilbo. Modu horretan, ­urriaren 26an, Taiwango Taipei hirian, AIFren 2011ko Kongresuan, Industria Diseinu­aren Sozietatearen Nazioarteko Kontseiluak hiri irabazlea iragarriko du. Bitartean, lehiaketaren Batzorde Antolatzaileak finalistak bisitatu egin ditu.

Bilbok babes handia izan du ekimen hau abiaraztean, Udala, Bizkaiko Foru Aldundia eta Eus­ko Jaurlaritza, besteak beste, izan dira proiektuaren bultzatzaile. Bestetik, lankidetza handia izan du: Merkataritza Ganbara, Inno­basque, Cebek, Creativity Zen­trum, BEAZ, Bilbao Ría 2000, BBK, euskal arkitektoen eskolak eta ekonomialariak, diseinatzaileak, unibertsitateak edo diseinu eta enpresa-garapenari lotutako hainbat erakunde publiko nahiz pribatu. Horiez gain, herri-erakunde ugariren atxikimenduzko gutunak jaso ditu Bizkaiko hiriburuak, adibidez: Philippe Starck diseinatzailea, Norman Foster arkitektoa, Paola Zini (Torino 2008 World Design Capital ekimenaren Zuzendaria), Alvin Yip irakaslea, Hong Kongeko Uni­ber­tsitatea...

Baina zer da, zehazki aitorpen hau? Eta zertarako balio du? Diseinuaren Munduko Hiribu­ru­aren izendapena aintzatespen bat da; horren arabera, hiria berpizteko ekimenak eta esfortzuak antzematen dira eta bertan bizi diren herritarren bizi-kalitatea aitortzen da diseinua modu erabilgarrian erabili izanagatik.

Horrela, Bilbo Diseinuaren 2014ko Munduko Hiriburu bi­hurtzeko hautagai gisa aurkeztuta, Bilbo, Bizkaia eta Euskadi ­osoan lehiakortasuna nahiz bizi-kalitatea hobetzeko diseinuaren garrantzia nabarmentzearen aldeko apostua egin da. Izen­da­pe­na lortzen badu, erreferen­te bi­hur daiteke diseinuaren, berri­kun­tzaren eta sormenaren erabilerari dagokionez.

Bestetik, aintzatespena eskuratzen duten hautagaiek, nazioarteko onarpena ekartzeaz gain, sustapena dute bidelagun, turismoaren igoera, adibidez. Orain arte honakoek lortu dute izendapena: Turin (2008), Seul (2010) eta Helsinki (2012).

Ardatzak. 2011ko Bizkaiko Di­seinuaren Munduko Hiriburu hautagaitzak ardatz batzuk ditu, egitasmoan honako puntu hauek desberdintzen eta egituratzen dira: Artea eta Teknologia (bertan kokatzen dira arte eskolak, museoak, galeriak, kultur guneak, diseinu digitala...), Hirietarako soluzioak + Eko-teknologia (hiriko diseinua, arkitektua, azpiegitura, mugikortasun iraunkorra...) eta Turismoa, Osasuna + Ongizatea (kultur turismoa, gastronomia, dendak, hotelak...).
Urriaren 26an Bizkaiak begiak ipiniko ditu Taiwango Taipei hirian, alea jacta est.

Hautagaitzako ardatzak

Bilbok lerro batzuei heldu die hautagaitza aurkezteko unean:
Artea eta Teknologia.
Bertan kokatzen dira arte eskolak eta erakundeak, kultur zentroak, museoak, galeriak, diseinu industriala eta digitala, arte eszenikoak...

Hiri konponbideak. Eko-Teknologiak pisua hartzen du. Hiri diseinua eta arkitektua, energia alternatiboen diseinua, azpiegiturak, hiri-garraioak eta mugikortasun iraunkorra, arkitektura eskolak, fundazioak edo ikastetxeak.

Turismoa eta Osasuna. Hiritarren ongizateak berebiziko garrantzia dauka. Kultur turismoa, gizarte-osasuneko erakundeak eta eskolak, ongizate-turismoa, gastronomia, hotelak, kafeak edo saltokiak.