Euskal Herriko Kantauriko Antxoa’ berme-marka aur­­­keztu berri dute Bil­bon Euskadiko zenbait kontserbagile artisauk. Xedea sinplea da, bereizgarri honekin kontsumitzaileek errazago identifikatu ahal izango dute erosten ari diren produktua, Kantauri Itsa­soan arte tradizional selektiboez harrapatutako 'Engraulis En­crasicholus' espezieko antxoa, hain zuzen. Gainera, berme-marka honekin kontserben geroko elaborazioko %100 euskal kostaldeko kontserba-enpresek egindakoa dela jakingo dute berme osoz.

Ondarroa, Berriatua, Mar­ki­na, Mutriku eta Zumaiako bost kontserba-enpresek abiatu dute ekimena. Halere, enpresa hauek antzeko etiketa bat sortu zuten 2008an Kantauriko uretan harrapatutako atun hegaluzearen kalitatea ziurtatzeko.

Zigilu berri honek ezarri diren baldintza zorrotzak bete ditu, UNE-EN 45011 arauari atxikitako betebeharrekin bat egin du eta Eusko Jaurlaritzako Ne­ka­zaritza, Arrantza eta Elika­du­ra Sailari lotutako Kalitatea Fun­dazioaren ziurtapena lortu du.

Bilbon antolatutako aurkezpen ekitaldian, kontserbagile artisau horietako kideek antxoaren xerrak egiteko prozesu tradizionalaren nondik norakoak erakutsi zituzten eta aholkuak plazaratu zituzten. Egun, lata ­edo poteetan ontziratutako an­txoa-xerrak eta antxoa gazituz betetako lata handiak aski ezagunak eta preziatuak dira bertako merkatuan; gainera, sukaldaritza alorreko espezialitate ­ugariren funtsezko osagai bilakatu dira.