AlhóndigaBilbaok “Eztabaidatu dezagun zientziaz. Jokatu eta erabaki” ekimena antolatu du larunbat honetan Elhuyar Fundazioaren laguntzarekin, 2011ko Kimikaren Nazioarteko Urtearen ospakizunen barruan.

30 pertsonek parte hartu dute ekimenean, eta aukera izan dute nanoteknologiaz ikasi, eztabaidatu, iritziak konpartitu eta ondo pasatzeko. Parte-hartzaileak nanoteknologia garatzearen alde agertu dira, eta, hori ondo egiteko, erregulazioa eta eztabaida publikoa sustatu behar direla eskatu dute. Bilbon ateratako ondorioak Europan zabaldu dira, gainera,  www.playdecide.eu webgunearen bitartez, eta Europako beste herrialdeetan halako ekimenen bidez esandakoetara batu dira.

Eztabaida-joko bat izan da saioaren ardatza. Parte-hartzaileak bi orduz aritu dira nanoteknologiaz, eta, oro har, aurrerapen teknologikoaz, eta honek gizartean duen eraginaren inguruan: aukerak, arriskuak, beldurrak, neurriak, arduradunak, gizartearen perte-hartzea... halakoez eztabaidatu dute, eta talde-ikuspuntua bateratzen saiatu dira.

Saioaren amaieran, emaitzak gehitu egin dira beste PlayDecide saio batzuetan esandakoetara, eta,  ondorioztatu ahal izan da Alhondigan bildutakoek informazio eta eztabaida publiko handiagoa eskatzen dutela gainerako europarrek baino. Egindako saio guztien emaitzak proiektuaren webgunean ikus eta konpara daitezke.

Europako PlayDecide proiektuan oinarritzen da “Jokatu eta Erabaki” ekimena. Gizartean eztabaida piztea eta ondorioak entzun araztea da honen helburua. Horretarako, informazioaz gain, eztabaidarako eta adostasunerako ildoak ematen dituen jokoa proposatzen dute. Lehengo aldia da Euskal Herrian horrelako ekimen bat egiten dena.

Antolatzaileak pozik agertu dira saioaren emaitzarekin, eta gehiagotan egiteko gogoa erakutsi dute. Izan ere, parte-hartzaileak gogotsu aritu dira eztabaidan, eta hainbat adin eta profiletako pertsonak bildu dira Alhondegian. "Iritziak trukatu ditugu, ikuspegiak gerturatu ditugu, eta politika bat adosteko gaitasuna erakutsi dugu; ikasteko balio izan digu guztioi, azken batean” adierazi dute antolatzaileek.