Otsailaren 22an informazio hitzaldia emango du Gernika-Lumoko Kultur Etxean GERNIKA-LUMO.(2012-02-15)- Gernika-Lumoko Merkataritza Dinamizatzeko Bulegoak, Bilboko Merkataritza Ganberarekin elkarlanean, “Kalidenda 2012” programari buruzko informazioa emateko hitzaldia antolatu du. Honen bitartez, parte hartzen duten eskualdeko saltokiek kalitate ziurtagiria lortzeko aukera izango dute, UNE 175001 araua betetzerakoan. Jardunaldia otsailaren 22an izango da, 14:30etik aurrera,Kultur Etxean.

“Kalidenda” programak bi fase ditu. Lehenengoan, praktika tailerra egingo da taldean. Bertan arauaren zehaztasunak jakinarazi eta azalduko dira, azalpen praktikoak emango dira eta ziurtagiriarekin loturiko dokumentazioa banatuko da.

Ondoren, aholkulari batek interesa azaldu duten saltoki guztiak bisitatuko ditu kalitate sistemaren ezarpenean laguntzeko. Bigarren bisitaldi baten, saltoki bakoitzak banan-banan jasoko du arautegia zein neurritan ezarrita duen aztertzeko aholkularitza eta ikuskaritza txostena egingo zaio.

Hiru urterako ziurtagiria
Ziurtatze prozesua aholkulari batek bi sasoi desberdinetan egingo dituen bisiten bitartez gauzatuko da. Lehenengoan, ikuskatzaileak ez du bere nortasuna jakinaraziko, eta bigarrenean, nor den azaldu ostean, sistema aztertuko du saltokiko arduradunarekin batera. Igortzen diren ziurtagiriak hiru urterako balioa izaten dute eta urtero berritu behar izaten dira. Titulua dohain lortzen da, Lakuako Gobernuak horretarako dirulaguntzak ematen dituelako.

Hobariak dirulaguntzatan
Ziurtagiri hau eskuratu duten enpresek kopuru handiagoak lortuko dituzte Merkataritzarako Ekipamenduen Modernizaziorako dirulaguntzak eskatzen dituztenean.