Langileen prestakuntza hobetzea helburu duten lau formakuntza ikastaro hauetan izena eman daiteke jada; aspektu desberdinak landuko dituzte eibarren.
Bileren dinamizazioa, buru-mapak, jende aurrean hitz egiteko teknikak edo linux erabiltzen ikasiko da. Ikastaroak doakoak izango dira eta abendutik aurrera eskainiko dira eibarko ikastetxe nagusian.

Udako Euskal Unibertsi­ta­tea Hobetuz pres­takun­tza programan arituko da lehenengo aldiz. Lau ikastaro eskainiko ditu doan langileen prestakuntzarako programa barruan, euskara hutsez, abendutik aurrera. Ikastaro hauek 20 eta 30 ordu bitartekoak izango dira eta Ei­barko (Gipuzkoa) Ikastetxe Na­­gu­sian eskainiko ditu.

Jada ikastaroetan izena emateko epea zabalik dago eta horretarako, www.ueu.org web-orrian matrikulazio-orria bete behar da. UEUko iturriek jakitera ­eman dutenez, lehenengo ikastaroa ‘Bileren dinamizazioa’ izango da, eta irakaslea Eli Moreno Carrillo psikologoa, bitartekari familiarra eta sexologoa izango da. Lehenengo ikastaro praktiko honetan, bilerak planifikatu eta dinamizatzeko teknikak desbedinak eta eraginkorrak landuko dira.

Bigarren ikastaroa ‘Ideiak sor­tu eta antolatzeko teknika: buru-mapak (mind-mapping)‘ ­izango da. Honetan, Tony eta Ba­rry Buzan anaiek sortutako ‘The mind mapping book’ liburuan jarritako oinarriak jarraituko dira eta norberak bere buru-mapak egiten ikasiko du. Ikas­taro honetako ira­kas­lea Ele­der Aurtenetxe Pildaini sormen arloko trebatzaile eta ­aholkularia ­izango da.

Hirugarren ikastaroa ‘Linux erabiltzen hasi: Ubunturako sarrera’ eskainiko da, Igor Ruiz Agundez Ingeniari informatikoa eta Deustuko Unibertsitateko ­ikerlariaren eskutik. Software lisistema libreak instalatu eta era praktikoan erabiltzen ikasiko da, 'Ubuntu' izeneko distribuzioarekin batera.

Azkenik, Gotzon Carcar 'coach' pertsonala eta profesionala, Trainer's Training Masterrak Programazio Neuro­linguisti­ko­an ‘Jendearen aurrean hitz egiteko teknikak’ ikastaroa emango du. Honakoan, ideiak, proposamenak edo proiektuak komunikatzeko gaitasuna landuko da. Hala, jende aurrean hitz egiten eta mezua ahalik hoberen transmititzen ikasiko da.