Azaroaren 9tik 11ra, UPV/EHUko Gipuzkoako Campuseko Carlos Santamaria Zentroaren entzunaretoan, ‘ILCLI International Workshop on Semantics, Pragmatics and Rhetoric’SPR-11) izeneko nazioarteko kongresua egingo da. UPV/EHUko Logika, Kognizio, Hizkuntza eta Informaziorako Institutuak (ILCLIk) duela 10 urtetik hona antolatu duen ekitaldia da hau. Aurtengoan, mundu osotik datozen Semantika, Pragmatika eta Erretorikako ehun ikerlari inguru bilduko ditu Donostian.

Punta-puntako ikerlari horiek guztiek, beraien ikerketa berrienak aurkeztu eta eztabaidatuko dituzte, esanahia aztertzeaz arduratzen diren hiru diziplina hauen esparruan beti ere: Semantika (gure hizkuntzetako hitz eta esaldien esanahiaren azterketa), Pragmatika (hizkuntzaren azterketa komunikazioan) eta Erretorika (hizkuntzaren azterketa pertsuasioan).

Honako hauek dira hizlari gonbidatuak:

• Robyn Carston, Londresko University College-eko katedraduna Hizkuntzalaritzan, Pragmatika ikerlari entzutetsua mundu osoan.

• Maite Ezcurdia, Mexikoko UNAMeko Instituto de Investigaciones Filosóficas-eko ikerlaria, Semantikan eta Hizkuntzaren Filosofian aditua.

• Istvan Keckskes, New Yorkeko State University-ko katedraduna, kulturarteko pragmatikan aditua eta izen bereko (Intercultural Pragmatics) aldizkariaren zuzendaria.

• Ofra Magidor, Oxfordeko Unibertsitateko irakaslea, Hizkuntzaren Filosofian aditua.

• Genoveva Martí, ICREAko ikerlari seniorra, Bartzelonako Unibertsitateari atxikia, Semantikan eta Hizkuntzaren Filosofian ospe handikoa.

• Jeff Pelletier, Kanadako Alberta Unibertsitateko hizkuntzalari eta filosofoa, Linguistics and Philosophy aldizkari ezagunaren zuzendari ohia.

• John Perry, Kaliforniako Stanford eta Riverside unibertsitateetako katedraduna Filosofian, honoris causa doktore UPV/EHUn, Philosophy Talk irratsaioko  bi aurkezleetariko bat. IgNobel saria irabazi du duela oso gutxi, Structured Procrastination saiakera lanagatik. Critical Pragmatcs liburuaren egilea, Kepa Kortarekin batera.

• Howard Wettstein, Kaliforniako Riverside Unibertsitateko katedraduna Filosofian. Has Semantics Rested on a Mistake? lanaren egilea, eta baita Semantikako eta Hizkuntzaren Filosofiako beste lan askorena ere.

• Eros Corazza, Ottawako (Kanada) Carleton Unibertsitateko katedraduna Filosofian, eta Ikerbasque ikerlaria ILCLIn, alegia, jardunaldi hauek antolatu dituen UPV/EHUko Institutuan.

70 komunikaziotik gora jaso ziren eta, horien artetik, batzorde zientifikoak 41 aukeratu ditu, azaroaren 9an, 10ean eta 11n, Gipuzkoako Campuseko Carlos Santamaria Zentroaren entzunaretoan, aurkeztuko direnak. Komunikazio horien autoreen artean badaude ikerlari entzutetsuak, esate baterako Wayne Davis (Georgetown, AEB), Yan Huang (Auckland, Zelanda Berria), Robin Jeshion (Southern California) eta Eleonora Orlando (Buenos Aires), baina baita ikerlari gazteagoak ere, adibidez Eduardo García-Ramírez (UNAM, Mexiko), Alison Hall (University College, Londres), Joana Garmendia (ILCLI, UPV/EHU) eta Larraitz Zubeldia (University College, Londres & ILCLI, UPV/EHU).

Egitaraua eta informazio gehiago: http://www.ilcli.ehu.es