Zabalik da 2012-2013 ikasturtean izena emateko epea. Hezkuntza zerbitzu honek lana eta familia bateragarri egiteko baliabideak jartzen ditu. 0 eta 2 urte arteko haurrentzat 13 eskola ditu Bizkaian BBKren Gizarte Ekintzak.

BBKren Gizarte-ekintzako Haur Eskolek zabaldu dute 2012-2013 ikasturtean izena emateko epea. Guztira 666 plaza eskainiko ditu sare honek Bizkaian, guztiak 0 eta 2 urte arteko haurrentzat. Haur Eskola sarearen xede nagusietakoa da hezkuntza eta gizarte-laguntzaren bitartez, bateragarriak egitea gurasoen lana eta familiako bizitza. Horretarako arreta-ordutegi zabala dute, goizeko 7:30etan hasi eta arratsaldeko 18:00etan amaitzen baita. Ordutegi horren baitan, legeak ezartzen dituen egonaldi mugak errespetatzen dira beti Haur Eskoletan.

Haur hezkuntzan espezialista diren 100 irakasle inguruko taldeak ahaleginak egiten ditu haurren komunikazio ahalmenak bultzatzen, bai eta musikarenganako joera indartu edo gaitasun plastikoak garatzen ere. Heziketa-jolasek, heziketa elebidunaren bitartez, psikomotrizitatea hobetzeko aukera ematen dute eta haurren arteko harremanak elkarbizitzaren eta begirunearen lehen ikasgaia izaten dira. Hori guztia haurren garapen intelektualera, fisiko eta sozialera bideratuta.

13 hezkuntza zentrok osatzen dute BBKko Gizarte Ekintzaren Haur Eskola sarea,  Bilbo, Barakaldo, Basauri, Getxo, Santurtzi eta  Sestaoko udalerrietan. Familia bakoitzak hilero ordaintzen duen kuota bakoitzaren erosteko-ahalmenaren arabera kalkulatzen da, eta prezioaren baitan doa haurren beharretara egokitu eta prestatutako menua. Haurren izena emateko epea zabalik da eta hezkuntza zentruetan egiten da zuzenean.