Hezkuntza, Unibertsitate eta Ikerketa Sailak gaur, urtarrilak 30, hasiera eman dio Haur Hezkuntzan, bi urtetik aurrera, Lehen Hezkuntzan eta Derrigorrezko Bigarren Hezkuntzan aurre matrikulatzeko epeari. Eskaerak jasotzeko aldia otsailaren 9ra artekoa izango da, Internet-en bidez www.hezkuntza.net helbidean, edo otsailaren 10era artekoa, eskaera ikastetxean bertan egiten bada.

Tramite guztiak Internet-en bidez egiteko gomendioa ematen du, aurten ere, Hezkuntza Sailak, burokrazia asko kentzen baitie ikastetxeei eta itxarote-ilarak eta eragozpenak arintzeko aukera ematen baitie familiei. Gainera, aurre matrikula on-line tramitatzea paper guztiak betetzean akatsak ez egiteko modu ona da. Gurasoek beren seme-alaben izen-emateak egiteko bide hori aukeratzen badute, lehen aukera gisa hautatu duten ikastetxera joan beharko dute, eskatzen zaien dokumentazio guztia aurkezteko, baina oso denbora gutxi egon beharko dute.

Datorren otsailaren 16an emango da eskatzaileen zerrenda argitara eta martxoaren 9an plazak esleitzeko behin-behineko zerrendak. Data horretatik aurrera, martxoaren 21a izango da gurasoek erreklamazioak aurkezteko azken eguna. Astebete geroago, 2012ko martxoaren 28an, behin-betiko zerrendak ezagutzera emango dira eta bi egun geroago bigarren eta hirugarren aukeren zerrendak emango dira argitara.