Bilbo Zaharrean kokatua, zazpi ikastolek osatutako proiektuaren inaugurazio-ekitaldia antolatu da goizean.

Ikastolek Lanbide Heziketara bideratutako eraikina zabaldu dute gaur Bilboko San Frantzisko auzoan. Bertan izan dira, besteak beste, Iñaki Azkuna, Bilboko Alkatea; Koldo Tellitu, Ikastolen Elkarteko lehendakaria; Juan Carlos Gomez, zentroaren titulartasuna duen erakundeko lehendakaria edo Jon Ander Altube, erakundeko gerentea.

Eraikina ofizialki gaur inauguratu bada ere, ikasturte hasieratik ari dira ikasleak lanean. Oraingoz, ehun ikasle inguruk hartzen dute parte Informatika eta Komunikazioetako erdi mailako zikloa eta Jarduera Fisikoko eta Kirol Jarduetarako goi mailako zikloa egiten. Formazio ez-arautuari dagokionez, ikasturtean zehar aurreikusitako ikastaroetan 500 pertsona inguru parte hartzea espero dute sustatzaileek.

Harrobia proiektua 2006an jaio zen, zazpi ikastola elkartu zirenean: Bilboko Abusu eta Urretxindorra, Santurtziko Bihotz Gaztea, Galdakaoko Eguzki Begi, Balmasedako Zubi Zaharra, Trapagarango Itxaropena eta Leioako Betiko Ikastola. Zentroko titularrek eraikinari Ikastolen Lanbide Etxea izena eman diote, Lanbide Heziketarako etxea, alegia; hori dela eta, arlo horretan dauden proiektuen eskura jartzen du eraikina.

Egun, Ibar Ezkerra Lanbide Ikastolak ematen ditu eskolak, nahiz eta fundazio titularraren parte ez izan, Halaber, Fundazioa prest dago auzoaren hezkuntza-eskaintza eta euskara sustatzera zuzendutako ekimenn sozialak bere baitan hartzeko.