Bizkaiko Foru Aldundiak goi-mailako trebakuntza duten langileak erakarri nahi ditu eta horretarako Bizkaia: xede Laguntza Programa jarri zuen martxan duela bost urte. Programak 3,2 milioi euroko aurrekontua du, eta Europar Batasunaren 2 milioi euroko laguntza ere badu; guztira, 40 erakundek eta 71 lagunek hartu dute parte aldundiaren planean.

Askotan esaten da gizakiok adimena zorrozten dugula negu gorrietan. Gaur egun inork ez du zalantzan jartzen krisia gogor ari dela jotzen, eta adituen hitzetan, talentua, kreatibitatea eta ekintzailetza ezinbesteko tresnak dira aurrera ateratzeko. Bizkaiko Foru Aldundia bat dator horrekin, ziur asko, eta horregatik, langile adituak Biz­kaian bertan lan egiteko ahalegina egiten ari da. Horretarako, Bizkaia:xede Lagun­tza Programa jarri du martxan, ­eta guztira, 40 erakundek eta 71 lagunek hartu dute parte. Planaren aurre­kontua 3,2 milioi eurokoa da, eta Euro­par Bata­sunak ere finan­tzatuko du aldundiaren programa 2 milioi eurorekin, 2011-2014 la­ur­te­ko­rako. Diru hori mundu ­osoko 53 profesional eta ikertzaile kontratatzeko erabiliko da, euren lana ­egoitza Bizkaian duten erakundeetan egin dezaten.

Askotan abagunerik eza dute goi-mailako trebakuntza duten langileek gure artean lan egiteko. Horixe ekidin nahi du Bizkaiko Foru Aldundiak, buru argiek alde egin ez dezatela. Gainera, talentu berriak fitxatzea eta joan zirenak berreskuratzea ditu helburu aldundiaren programak. Ha­laber, planari esker, balio handiko langile horiek kontratatu, trebatu, gaitu eta lotzeko aukera izango dugu Bizkaian. “Goi mailako pro­fesionalak behar ditugu, eskarmentu handikoak eta konprometituak, XXI. mendeko liderrak izateko”, esan du Jose Luis Bilbao ahaldun nagusiak.

Hainbat erakundek hartu dute parte programan: teknologia-zentroak, ikerketa-taldeak, unibertsitateak, elkarteak, fundazioak... Horiek guztiak hartu zituen Aldundiak foru jauregian ekitaldi batean, martxoan, eta bertan ­omenaldia ere egin zitzaien. “Biz­­kaiko Lurralde Historikoan ezagutza aurreratuan oinarritutako gizartea eratzeko gai izango den giza egitura lortu behar dugu guztion artean”, esan du Bilbaok. Programa bost deialditan garatu da azken urteotan: lehenengoan, 336.000 euro bideratu ziren 6 ­onuradunentzat; bigarrenean, 475.000 euro, 8 hitzarmen berrirekin; hirugarrenean, 887.224,43 euro eta 19 onuradun; laugarrenean, 809.130,05 euro 21 onura­dunekin; eta, azken honetan, 789.227,32 euro 17 onuradun berrirekin. Onura­dunak egoitza Biz­kaian duten ­erakunde mota asko izan dira. Horiek, urte horietan, prestakuntza handiko eta lanbide-­esperientzia luzeko per­tsonak kontratatu dituzte, baita prestakuntza handia baina lanbide-­esperientzia mugatua dutenak ­ere.

Gainera, emigratu egin duten Bizkaiko gazteak ez ezik, prestakuntza-maila handia baina lanbide-esperientzia mugatua du­­­ten profesional gazteen prestakuntza eta erakarpena sustatu dute. Era berean, goi-mailako prestakun­tza eta egiaztatutako nazioarteko esperientzia duten pertsonak lotu dituzte, aldi baterako ­edo era mugagabean, Biz­kaian dauden proiek­tu berritzaileetarako.

Parte-hartzaileak. Bizkaia: xede ekimenean parte hartu duten ­erakundeak anitzak dira, baita bakoitzak lantzen duen esparrua ere: 20 kandidaturak Biozi­en­tziak jorratzen dituzte; 31k, Iker­keta, Garapena eta Berri­kuntza (I+G+B) mailako proiektuak; eta gainerako 20ak antolakuntzan ­eta kudeaketan aritu dira. Lau urte hauetan, 32 bizkaitar berreskuratu dira (20 gizon eta 12 emakume), eta besteak (39), hainbat lekutatik etorri dira: bai Euskal Herritik (Araba, Gipuz­koa eta Nafarroa), bai Estatu espainiarretik (Kantabria, Errioxa, Va­lla­do­lid, Galizia, Asturias eta Kata­lu­nia), bai atzerritik (Erru­sia, Ar­gen­tina, Alemania, Erre­suma Batua, Polonia, Suedia, Da­ni­marka, India, Austria, Me­xiko, AEB, Frantzia eta Italia).

Ikertzaileak pozik agertu ziren ekitaldian, eta euren esanetan, “erakunde publikoen babesa funtsezkoa da, eta Bizkaian eskaintzen den lan egiteko aukera ez dute beste inon topatu”; hori dela-eta, hemen daude lanean. Aditu horiek zenbait arlotan jarduten dute: automobilgintzan, ­aeronautikan, energia-iturrietan, telekomunikazioetan eta Infor­ma­­zioaren eta Komunika­zioaren Teknologietan (IKT) eta finan­tzetan, besteak beste.