Ana Izaguirre / Basquetourreko Zuzendaria

Gaizka Eguzkiza

Krisiari izkin egin dio Euskadiko turismo sektoreak. Izan ere, aurten inoiz baino turista gehiago etorri dira gure herrira. Bitartean, Eusko Jaurlaritzak eta Estatuko Gobernuak turismoa sustatzeko hitzarmena sinatu dute lehen aldiz. Horrek eztabaida piztu du eta, besteak beste, horren inguruan egon gara hitz egiten Ana Izaguirre Basquetourreko zuzendariarekin.

Eusko Jaurlaritzak eta Es­painiako Gobernuak turismoa bultzatzeko hitzarmena sinatu dute aurten. Zergatik aurten? Eta zergatik piztu du horrek eztabaida?
Turespañak eta biok elkarrekin lan eginez gero, geure jarduerek errentagarritasun handiagoa ­izan­go dute. Aurten Turespaña du­gu lankide; erakunde horrek eskarmentu handia du: aditua da turismoa sustatzen, eta urteak ­eta urteak daramatza sektore horretan. Gainera, oso ibilbide ­arrakastatsua izan du. Hori onuragarria da Euskadirentzat: guk turismoa bultzatzeko egiten ditugun ahaleginei Turespa­ña­re­nak egiten dituenak gaineratu behar zaizkie, hitzarmenari esker. Gure ustez, horrela hobeto aprobetxatzen dira baliabide publikoak. Eztabaida? Hori politika eta turismo-sustapena nahastu dituenari galdetu beharko zaio. Gure ustez, ahaleginak eta baliabideak batzen baditugu onuragarria da Euskadirentzat. Eta ­emaitzak ikusita, zuzen gabil­tza.

Krisi bortitza egon arren, gero eta turista gehiago hurbiltzen da Euskadira. Zer dela-eta?
Turismoari dagokionez, urterik onena da aurtengoa. Azken 13 hilabeteotan hazi baino ez dugu egin, eta 2010ean %12 igo da turisten kopurua, iazkoekin konparatuta. Egoera ona da, besteak beste, sektoreko eragileek izugarrizko ahalegina egin dutelako zerbitzuak hobetzeko eta goi-mailako produktua eskaintzeko.

Krisia aipatu dut. Zelan bizi du sektoreak krisia?
Estatistiken arabera, sektorea ez dago krisian. Eta egotekotan, beste inor baino hobeto dabil krisia gainditzen. Ahalegin han­­dia egin behar izan du sektoreak mundu mailan dagoen egoerara egokitzeko eta prezioak jaitsi behar izan dira, baina lehiakortasunari eutsi egin zaio.

Zeintzuk dira gabeziak? Eta indarguneak?
Legealdi honetan Marketing Pla­na onartu dugu eta oraindik hori garatu behar dugu. Turis­moa beste ekoizpen-sektore bat izango balitz bezala hartu behar dugu. Gure ustez, Euskadiko Bar­ne-Produktu Gordinean turismoak duen garrantzia igotzeko aukera dago datozen urteotan.
Beste alde batetik, produktu berri batzuk lantzen gabiltza: Do­ne Jakue Bidea, surfa, natura... Ez gara zerotik hasi: gure turismo-sektorea lehiakorrena da Estatu mailan, Excelturrek eta De­loittek ­egindako MoniTur ­iker­ke­taren arabera. Kalitateari dagokionez, ziurtagiria lortutako establezimendu gehien dutenetakoak gara. Beraz, zerbitzuaren bikaintasuna bermatzen ­dugu.

Eguraldi onak erakartzen ditu turistak, baina Euskal Herrian eguraldia ez da batere fidagarria. Zer egin ahal da erakargarriak izateko?
Ezin dugu eguraldia aldatu. De­na dela, hondartza eta eguzkia soilik bilatzen ez duen turista ­egon badago. Horiek esperien­tzien bila etortzen zaizkigu eta esparru horretan oso erakargarria da Euskadi: gastronomia, ­eno­logia, negozioak... Gaur ­egun­­go beharrak ezberdinak dira: adibidez, Internetek izugarrizko aldaketa ekarri du bidaiak antolatzeko orduan.

1997an Guggenheim Bilbao Museoa ireki zuten, eta horrek izugarrizko bultzada eman zion euskal turismoari. Bukatu da museo horren eragina? Zer ­iruditzen zaizu Urdaibain egin nahi izan den beste museo ­hori?
Guggenheim gure baliabiderik onenetarikoa da, baina, horretaz aparte, zorionez, beste eskaintza erakargarri batzuk ere baditugu. Urdaibain egin nahi den beste Guggenheim museo horri dagokionez, esan behar dut Eusko Jaurlaritzak beste apustu bat egin duela, eta eskualde horren garapena beste era batean bideratuko dugula.

Gurera etortzen diren turista batzuk kexatu egiten dira jaiegunetan dendak eta jantoki asko ­itxi­ta daudelako. Egia al da? Ba al dago kon­ponbiderik?
Donostia bezalako hiri batzuetan negozioa egiteko aukera aspaldian ikusi zuten eta jaiegunetan dendak eta jantokiak irekita daude gehien bat. Ostalaritza-­enpresariek ulertu behar dute aukera hori. Adibidez, Bilbon ez dira oraindik konturatu. Turis­tak asteburuetan etortzen bazaizkigu, zerbitzuak eskura izan beharko lituzkete: erosketak egiteko, bazkaltzeko... Hori izango litzateke logikoena.